CEBU, Philippines - Miarte na sab ang "Dolanstoppable" nga si Dolan Adlawan ug ang iyang lay-up sa nahabiling 14 segundos maoy mibaswat sa University of San Carlos (USC)-North Campus ngadto sa 63-61 nga kadaugan batok sa Cebu Eastern College (CEC) aron moabante sa finals sa Coca-Cola PBA Youngstars Basketball Tournament 2012 Cebu Leg.
Ang USC-North makigsangka batok sa University of the Visayas (UV), kinsa nakasud sab sa finals human gipalagpot ang Sacred Heart School-Ateneo 1 sa iskor nga 51-34.
Gawas ni Adlawan, mipakita sab og maayong labok silang Jude Bulan, Clint Suelto, Kent Malazarte ug playmaker Mikhail Lorenzo Piad.
Ang triple-shot ni Suelto maoy naghatag og labaw sa USC North, 56-55 sa nahabiling 1:17 sa duwa. Si Bulan miposa sab sa iyang triple aron inaton ang labaw ngadto sa 59-55 sa katapusang 48. 7 segundos sa regulasyon.
Bisan pa sa maong labaw, nakahimo gihapon sa pagsikit ang CEC, 58-59 human sa basket ni Michael Balankig, apan nakawang ang ilang mga paningkamot kay nahutdan kini sa oras.
Si Adlawan maoy nangu sa USC North sa iyang 20 puntos, gisundan ni Suelto nga adunay 15 puntos. Ang naparot nga CEC gipangulohan ni Alfonso Alvizo pinaagi sa iyang 17 puntos.
Sa laing duwa, ang UV nagsandig nilang Leonard Santillan, Gerald Fernandez ug Dave Cabanilla aron pagpukan sa SHS-Ateneo-1.
Si Santillan maoy nangu sa UV sa iyang 19 puntos, samtang si Jair Igna, kinsa igo lang miiskor og nuybe puntos mao ang nangu sa SHS-Ateneo -1.
Ang finals himuon karong buntag didto sa Aznar Coliseum. (BANAT SPORTS)