MANILA, Philippines - Matapos ibulsa ang puwesto sa semifinals, pipilitin ngayon ng NLEX Road Warriors na lumapit sa ikalawang adhikain, ang walisin ang 10 laro sa elimination round.
Kaharap ng back-to-back defending champion Road Warriors ang bagitong Cagayan Rising Suns sa tampok na laro sa dakong alas-4 ng hapon at balak isubi ng tropa ni coach Boyet Fernandez ang kanilang ikapitong sunod na panalo.
Bagamat angat na angat kung sa lakas ng manlalaro ang pag-uusapan, ayaw ni Fernandez na magkumpiyansa at itinuturo ang magandang ipinakita ng Suns sa huling dalawang asignatura.
Talunan man ang rookie team sa Boracay Rum at RnW Pacific Pipes, limang puntos lamang ang pinagsamang lamang ng nagwaging koponan para ipakitang palaban na ang tropa ni coach Alvin Pua.
“Wala pa rin sina Calvin (Abueva) at Ian (Sangalang) kaya dapat magtrabaho uli kami lalo na sa depensa sa simula pa lamang ng laro,” wika ni Fernandez.
Bago ito ay magtutuos muna ang Junior Powerade at Café France sa ganap na ika-2 ng hapon at ang mananalo ay mananatiling palaban para sa puwesto sa quarterfinals.
Angat ang Tigers sa ngayon sa 2-4 karta at kasalo ng Boracay Rum at Erase Plantcenta sa ikaanim hanggang ikawalong puwesto.
Ang mangungunang dalawang koponan ay didiretso na sa semifinals habang ang sunod na apat na teams ay maglalaro sa quarterfinals.
May 1-4 baraha ang Bakers na kinatampukan ng apat na sunod na pagkatalo.
Pero hindi inaalis ang kakayahan ng Bakers na manalo lalo pa’t on and off din ang larong nakikita sa Tigers.