CEBU, Philippines - Gilihian og daog ang Lion Tiger-University of San Jose Recoletos (USJR) Jaguars dihang ilang gilamoy ang Gaisano Tisa- University of Cebu (UC) Webmasters , 80-62, sa ilang opening match sa 6th CESAFI Partner's Cup kagahapon didto sa Cebu Coliseum.
Ang Lion Tiger naglabaw og 13 puntos sa halftime, 40-27, apan wala dinhi naundang ang ilang pagbangis dihang mipatusak og duha ka triples si Jason Olbedado ug Banjo Capillar aron paburoton ang labaw ngadto sa 21 points, 61-40 sa third period.
Kung unsa kainit ang opensa sa Lion Tiger, grabe usab nga namugnaw ang mga scorer sa Gaisano diin migawas nga leading scorer mao sila si Boholano rookie June Marco Mistal ug Arvin Kim Gomez kinsa mikolekta lang og nuybe puntos matag usa.
Hinuon mihimo og rally ang Gaisano Tisa ug napakunhod nila ang labaw ngadto sa 12 puntos, 53-65 sa nahibiling 6:48 sa duwa, apan kadto na ang katapusang higayun nga nakasikit sila dihang subling miatake ang Lion Tiger aron hingpit nga makuha ang daog.
Ang sakop sa gold medalist nga Region 7 team sa PRISAA nga si Olbedado maoy leading scorer sa iyang 21 puntos, samtang si Abulaiz Suliman midugang og 20 puntos.
Ang Lion Tiger masuwayan karong Huwebes sa ilang pakigharung sa Prime-Asia University of the Visayas (UV) Green Lancers.
Puntos matag usa:
Lion Tiger (80)— Olbedado 21, Suliman 20, Tabaloc 9, Regalado 6, Dela Rama 4, Capillar 3, Perez 3, Abing 3, Palatao 2, Molas 2, Palileo 2, Medalle 1, Lajato 1
Gaisano Tisa (62)— Gomez 9, Mistal 9, Niones 6, Villanueva 6, Quintao 5, Lumingkit 4, Cueva 4, Mohammad 3, Cabrera 3, Tamsi 5, Heruela 2, Auditor 2, Velez 2, Ada 2. - BANAT NEWS