CEBU, Philippines - Mipatigbabaw ang kusog sa mas bata nga si Chad Dawson batok sa future Hall-of-Famer nga si Bernard Hopkins kinsa napakyas pagdepensa sa iyang WBC light heavyweight title kagahapon didto sa Boardwalk Hall arena sa Atlantic City.
Si Dawson hingpit nang misirado sa panagribal nila ni Hopkins diin ang una nilang away niadtong Oktobre miresulta sa usa ka kontrobersiyal nga technical knockout win pabor ni Dawson.
Apan wala makupti ni Dawson ang bakus tungod usab sa protesta sa kampo ni Hopkins nga nakapaaghat sa WBC nga usbon ngadto sa draw ang resulta sa away.
Hinuon, gisegurado na ni Dawson nga limpyo ang iyang kadaugan dihang hinay-hinay niyang gipasudlan og mga kinumo ang depensa ni Hopkins kinsa naglisud pagtubag sa atake ni Dawson.
" Hopkins is a great fighter and he is going into the Hall of Fame. But I stepped my game up another notch," matud pa ni Dawson.
Sa iyang bahin, midako karon ang posibilidad sa hingpit nga pagretiro ni Hopkins sa boxing kinsa mihimo og record isip labing tiguwang nga world champion sa edad nga 47-anyos. LPM gikan sa wires (BANAT NEWS)