Nagkaanam nang nailhan ang mga Pinoy sa mga sports nga sa una pa lang natong pagtan-aw dili haom o dili kita mosaler sama sa wrestling, soccer, rugby, basketball, dragon boat, ug uban pang matang sa paugnat sa kusog nga diin dagkung atleta ang gipangita.
Apan tungod sa inter-marriages tali sa mga Pinoy ug mga langyaw partikular na sa mga puti, naka-produce ang Pilipinas og mga dagkung atleta. Una silang nakit-an sa atong lokal nga Philippine Basketball Association (PBA) nga atong gitawag og mga Fil-Ams tungod kay sagad kanila mga Filipino-Americans.
Hangtod nga nagdagan ang panahon daghan pang nisunod nga mga Fil-foreign athletes ang nasulod sa atong sporting teams ug mikulit og ilang mga pangalan sa international arenas. Usa na niini sa individual sports mao sila si Brandon Vera sa mixed martial arts, David Batista sa wrestling, ug uban pa.
Sa team sports naila ang atong mga basketbolista sa Gilas-Pilipinas sa nagkadaiyang basketball tournaments diin daghan sa team members mga Fil-foreigners.
Ang Azkals sa soccer nga dili pa lang kaayo dugay dihang atong gidayeg ug gibiliban tungod sa ilang mga kalampusan sa nagsunod nga mga international outings ilabi na sa uwahi nilang duwa sa Asian Challenge Cup sa Kathmandu, Nepal diin sila mitapos nga third place.
Nindot kadto tungod kay mao na kini ang labing taas nga level nga nakab-ot sa usa ka team sa football gikan sa Pilipinas sukad sa kasaysayan sa pagsalmot nato sa maong sports. Nakadawat usab sa pasidungog nga Golden Boot Award ang atong Azkal superstar nga si Phil Younghusband tungod sa 6 goals niini sa maong torneyo.
Ning bag-o lang, mikulit usab sa ilang kaugalingong legasiya ang mga Pinoy sa natad na usab sa sports nga gidominar sa mga dagkung mga tawo. Ang rugby. Sahi ra sa soccer nga maoy giduwaan sa Azkals mas grabe kini ka pisikal o binun-ogay gyud sa lawas.
Ang Philippine Volcanoes nga maoy national team sa Pilipinas sa duwa nga rugby mikulit og pangalan sa international rugby dihang ilang gipakugang ang kalibutan ug mibutang sa Pilipinas sa Top 5 Rugby Teams of Asia.
Bisan sagad kanila dili ‘pure blooded Pinoy’ o gitawag sa usa ka advertisement sa usa ka suka nga “half-Pinoys” dili ikalimod nga sila may dugong Filipino.
Ang Philippine Volcanoes mipatikangkang sa Sri Lanka 28-18 nga maoy nakaingon nga nabutang sa top five teams sa Asian rugby ang maong team. Sa sunod nga torneyo ang PHL Volcanoes maoy ikawalong team nga makasalmot sa HSBC Asian 5 Nations Top 5 sukad sa pagsugod sa maong torneyo niadtong 2008.
Bisan dili sila pure Pinoy kinahanglan ato gyud silang daygon ug suportahan tungod kay sila maoy nagdala sa atong pangalan ug Bandila.
* * *
PAGTULON-AN: Dili nimo makab-ot ang kalampusan kun ang imong mga kamot naa sa sulod sa imong bulsa.