CEBU, Philippines - Sugdan karon sa Prime Asia-UV Lancers ang ilang kampanya alang sa pagpanalipod sa ilang korona batok sa San Marino Corned Tuna-USPF Panthers sa pagsugod sa 6th CESAFI-Partner’s Cup karong adlawa diha sa Cebu Coliseum.
Sayo ning hapon, ang Gaisano Tisa-UC Webmasters makigsangka batok sa Lion Tiger Katol-USJR Jaguars diin anhi masukod kun andam na ba ang CESAFI reigning champion nga modepensa sa ilang korona ilabi na kay migradwar na ang ilang 6-foot-9 center nga si June Mar Fajardo.
Ang Lancers ni coach Felix 'Donbel' Belano nga maoy migamit sa Lion Tiger Katol sa miaging tuig dihang nidaog sa titulo batok sa Gaisano Capital, apan karon mag-uniporme sa ngan sa ilang corporate sponsor Prime Asia nga walay laing tinguha kun dili ang pagdepensa sa ilang titulo.
Ang bag-ong sakop sa Lancers mao ang bigman nga si Wowie Escocio, kinsa kadaghan na nga niduwa og mga barangay tournaments ug ubang gagmay nga liga gawas sa Sugbu.
Kanunay mas lig-on ang line-up sa Prime Asia kun itandi sa Panthers ni coach Raul Latonio Sr., apan sa miaging tuig dihang ang naulahi nigamit pa sa Rose Aquarius jersey, nahimo silang “darling of the crowd” tungod kay nakahimo sila sa pagpukan sa tulo sa labing lig-on nga teams nga naglakip sa UV, UC ug USJR aron moabante sa semifinals.
Karon nga ubos na sila sa San Marino, ang Panthers adunay mga bag-ong dagway kinsa moduwa alang sa CESAFI regular season.
Sa laing bahin, ang Webmasters nakakuha og bag-ong bigman nga si Fil-Arabian Saeed Quintao nga maoy motapak sa gibakantihan ni Fajardo. (BANAT SPORTS)