CEBU, Philippines - Nakakawat og atensiyon si Dondon Yuson atol sa third leg sa 2012 MS Motosuit Motocross Series nga giuloha’g “14th Ornopia Cup” dihang miariya siya og duha ka championship trophies niadtong Domingo didto sa Calambua racetrack sa San Remigio sa amihanang bahin sa Sugbu.
Gipakita ni Yuson ang iyang katakus sa pagmaneobra sa iyang motorsiklo aron mapukan si Ted Conde sa pro ug sa expert divisions.
Si Pepo Rubi mi-okupar sa ikatulo sa pro class, samtang si Dexter Bacabac mipahiluna sa ikaduha sa expert division.
Sa laing bahin, sila si Peping Mar ug Arnel Lacnit nisakmit og titulo ug first runner-up finish.
Gipilde ni Mar ang karibal nga si Jordan Herrera aron maghari sa beginners open production, samtang si Ray Quirol mikapyot sa ikatulong dapit.
Pakyas si Mar pag-angkon og dobleng kadaugan human siya mapilde ngadto ni Lacnit sa novice open production.
Sama ni Mar, si Lacnit palpak sab paglansang og dobleng kadaugan dihang gipilde siya ni Bacabac sa intermediate class. Si John Flores mitapos sa ikatulo.
Sa open enduro, si Quirol maoy misakmit sa kampiyonato pinaagi sa pagpilde nilang Donkey Sanchez ug Kent Limpag nga mipahiluna sa ikaduha ug ikatulo.
Nakabawi hinuon si Limpag pinaagi sa pagdaog sa underbone race, samtang si Jun Enriquez naghari sa executive-B division. Si Enriquez nalagpot sa ikatulo sa executive-A nga gidominar ni Gener Sicad.
Si Butch Flores maoy nanghawod sa executive-C, gisundan nilang Jonathan Cuyos ug Noli Rom.
Sa peewee class, si BJ Pepito maoy mipatigbabaw batok nilang RK Cuesta ug Reggie Pepito nga miangkon sa ikaduha ug ikatulo nga dapit.
Gipasiugdahan sab sa Petron Phils. ug sa Du Ek Sam, ang kalihukan nagmalampuson pinaagi sab sa suporta sa RMO Motor Parts, F&FO Motor Parts, Prospeed, Motomaze, JCO Motor Parts, Casino Filipino, Cebu Fourth District Rep. Benhur Salimbangon, Provincial Board members Joven Mondigo ug Sun Shimura, San Remigio Mayor Jay Olivar, Borbon Mayor Butch Sepulveda, Noli Ornopia ug P/Insp. Mariano dela Peña Jr. (BANAT SPORTS)