CEBU, Philippines - Sa katapusan, nakaangkon na gyud og luna sila si Kristin Renee Salimbangon ug Joshua Kinaadman sa 2012 Milo Junior Tennis Cup National Finals human maghari sa ilang tagsa-tagsa ka dibisyon sa Luzon leg didto sa Clark Freeport Zone Tennis Club sa Mabalacat, Pampanga.
Human maalangini sa Visayas leg duha na ka semana ang milabay didto sa Cebu International Tennis Center Inc. (CITCI) sa Consolacion, sila si Salimbangon ug Kinaadman misulong sa Luzon uban ang paglaum nga matuman ang ilang pangandoy nga moduwa sa nationals.
Angay nga ipadala si Salimbangon tungod kay siya ang nanghawod sa girls 12 category. Nahimo usab siya nga runner-up sa girls 14 division.
Mao sab ang igsuon ni Kristine Renee nga si Cesar Kristofer, kinsa maoy naghari sa unisex 8-under, ang special class niining kompetisyon nga gipasiugdahan sa Children’s Tennis Workshop ug usa ka runner-up finish sa unisex 10-under.
Sa iyang bahin, si Kinaadman naghari sa boys 14 category. (BANAT SPORTS)