MANILA, Philippines - Paiinitin pa ng Boracay Rum ang pagbangon mula sa mababang puwesto sa pag-asinta sa ikalawang panalo laban sa bagitong Cagayan Rising Suns sa pagpapatuloy ngayon ng 2012 PBA D-League Foundation Cup sa Trinity University of Asia gym.
Ang laro ay mapapanood sa ganap na alas-12 ng tanghali at pilit na sasakyan ng Waves ang 64-60 panalo laban sa Junior Powerade na tumapos sa tatlong dikit na kabiguan.
“Struggling kami dahil hindi pa consistent ang mga players namin. Sana ang panalong kinuha namin ay magpapataas sa confidence ng mga players,” wika ni coach Lawrence Chongson.
Hindi pa rin nakakatikim ng panalo ang Suns matapos ang apat na laro at ito ang magsisilbing inspirasyon sa magaganap na tunggalian.
Sisikapin naman ng Tigers na makabangon agad sa tinamong kabiguan sa pagsukat sa Erase Plantcenta sa tampok na laro sa alas-2.
Nananalig si coach Ricky Dandan na lalabas uli ang tibay ng laro mula sa mga inaasahan para maisulong ang 2-2 karta.
Apat na koponan ang maaalis matapos ang elimination at kailangang manalo ang Tigers upang makapasok sa susunod na round.