CEBU, Philippines - Dose ka paresan sa mga rising amateur prospects ang magsinukliay og kumo sa 4th edition sa Mayor Jonas C. Cortes: Boxing at the Park Amateur Series ugma sa gabii diha sa Mandaue Plaza Square sa Mandaue City.
Ang beteranong si Mardie Muaña sa Cabancalan Elementary School makigbatok ni Jing Aguan sa Tagbilaran City, samtang duha ka mga out-of-town boxers nga sila si Kenny De Paldo sa Aklan ug Nelson Sandal sa Zamboanga City ang magpinaksitay.
Mag-unay usab ang mga boksidor gikan sa University of the Visayas (UV) nga sila si Dann Lou Codilla ug Allan Refuela, ang ilang teammate nga si Ariel Sibay makigsangka ni Raymundo Rama sa Phil-Aust Boxing Club (PABC).
Laing PABC boxers nga sila si BB Rama, Miguel Semblante ug Rhezon Tarona mopakita sab sa ilang katakus batok sa tagsa-tagsa nila ka kaatbang.
Si Rama makigharong ni Vicente Seos-e Jr., samtang si Semblante makigbinukbukay ni Marco Pumar ug si Tarona makigpinaksitay ni Kit Garces.
Mokompleto sa boxing card mao ang sangka nila ni Marvin Pumar batok Dominique Casañares, Ian Refuela batok Rie Muñez, Gerald Suico batok Christian Bacolod, Kevin Jake Catajara batok Ritchie Montealto ug Raul batok Rolan Servania. (BANAT SPORTS)