CEBU, Philippines - Gilusad na kagahapon ang 4th edition sa "Run for BB" nga mosikad sa Abril 15 didto sa Parkmall grounds sa Mandaue City.
Sama sa mga miaging "Run for BB," tuyo ug tumong sa maong lumba mao nga makakuha og pundong salapi aron itabang sa mga kabus nga kabataan, kinsa nag-antos sa sakit nga "cancer."
"Once again we will organize a run for our young cancer patients to help in sustaining funds for the continuation of their treatment," matud pa ni race organizer Rosario Naomi Fajardo sa Hematology-Oncology Unit atol sa press conference kagahapon didto sa Jollibee sa Parkmall.
Ang lumba adunay unom ka kategoriya nga mao 21K, 12K, 6K, 3K ug 400m ug 200m kiddie dash.
Mga ganting salapi ug medalya ang giandam alang sa top three finishers sa matag kategoriya. Ang makampiyon sa tagsa-tagsa ka dibisyon makaangkon og bag-ong TIMEX watch.
Ang registration fee nagkantidad og P550 alang sa 21K, P350 sa 12K, P300 sa 6K, P250 sa 3K ug P200 sa kiddie dash.
Niadtong interesadong modagan, mahimong magparehistro sa Chong Hua Hospital-Nursing Service Office, OPD and Cardio Unit ug sa Parkmall. (BANAT SPORTS)