MANILA, Philippines - Napilay ang laban ng Pilipinas kontra sa Pakistan nang tuluyan nang ihayag ng kampo ni Jeson Patrombon ang pagliban nito sa magaganap na second round Asia Oceana Zone Group II tie sa Philippine Columbian Association (PCA) indoor shell court mula Abril 6 hanggang 8.
Ang tinamong right ankle injury ni Patrombon sa paglahok sa F1 Futures sa Japan ay malala at mangangailangan ang 18-anyos netter ng dalawa hanggang tatlong linggong theraphy para tuluyang maghilom ang injury.
May posibilidad na gumaling ng mas maaga ang nasabing injury pero kulang na si Patrombon ng panahon para mapaghandaan ang mahalagang tie na kung saan ang mananalong bansa ay mananatiling palaban para umangat sa Group I sa 2013.
“Jeson will need at least 2 to 3 weeks of therapy and rest for his right ankle to fully recover. Even it he’s injury fully heel a week before the Davis Cup, Jeson won’t have enough time to train for the matches,” wika ni coach Manny Tecson.
Napag-usapan na nina Tecson at Philippine Davis Cup administrator Randy Villanueva ang sitwasyon at sumang-ayon ang huli sa gagawing pagliban ng tubong Iligan City na netter.
Nanguna si Patrombon sa kinuhang 5-0 panalo laban sa Pacific Oceania na ginawa noong Pebrero 11 hanggang 13 sa Iriga City nang manalo sa dalawang hinarap na laro.
Bukod kay Patrombon, sina Fil-Ams Treat Huey at Ruben Gonzales bukod pa sa beteranong si Johnny Arcilla ang mga regular members habang practice player si Jurence Zosimo Mendoza.