CEBU, Philippines - Nasakmit sa Simple Likes Barbecue Haus ang ikaduhang luna sa pagpangulo ni Mclean Alcueno dihang ilang gipakuratan ang kanhi solo leader Steven Jocabz, 92-83, samtang gipalagpot sa Chariz & Caleigh ang CMK Trading, 88-81 pagtapos sa elimination round sa 4th F. Llamas Youth Association (FYA) basketball tournament didto sa barangay Tisa gym, ning dakbayan.
Ang mga crucial baskets ni Alcueno maoy mihatag og kaseguroan sa kadaugan sa Simple Likes, kinsa mitapos sa eliminasyon bitbit ang 4-1 nga baraha. Isip No. 2 seed, ang Simple Likes nakaangkon sab og "twice-to-beat" advantage sa semifinals sugod sa Marso 12.
Si Alcueno miposa og 19 puntos, si Ryan Villaver miamot og 15 puntos alang sa Simple Likes ug si Wendell Ramoneda mitampo og 13 puntos alang sa Simple Likes. Ang playing coach nga si Noel Medalle ug Jakeson Dumaguit, miiskor og 11 puntos matag usa, samtang si JR Laurente mibahog og 10 puntos.
Si Dexter Caballero maoy nangu sa Steven Jocabz sa iyang 23 puntos.
Sa sayo pa, ang Chariz & Caleigh mipahiluna sa ikaupat nga dapit pagtapos sa eliminasyon sa ilang 3-2 nga baraha.
Si Chrissar Llegunas mipabuto og 26 points aron pangulohan ang Chariz & Caleigh, samtang sila si Tata Laborte ug Arnel Trinidad nagkumboya og 31 puntos.
Ang manghod ni Laborte nga si Nico miburak og 31 puntos aron pangulohan ang CMK Trading, gisundan ni Dondon Cadungog nga mihakot og 24 puntos.
PUNTOS MATAG USA
Unang duwa:
Chariz & Caleigh (88) - Llegunas 26, Laborte 16, Trinidad 15, Reubal 10, Lavandero 9, Abella 6, Nudalo 4, Villordon 2
CMK Trading (81) - N. Laborte 31, Cadungog 24, Tabar 13, Jabonero 6, Avila 5, Medalle 2
Ikaduhang duwa:
Simple Likes (92) - Alcueno 19, Villaver 15, Ramoneda 13, Medalle 11, Dumaguit 11, Laurente 10, Lañojan 6, Zapanta 6, Jakosalem 2
Steven Jocabz (83) - Caballero 23, Patalita 17, Garcia 11, Mirasol 8, Pacaña 7, Avila 6, Abella 5, Marata 4, Cajucson 2 (BANAT SPORTS)