TAGBILARAN CITY, Philippines -Talagsaong panghitabo ang mitumaw dihang nasakpan nga dili diay mao ang kontra nga angayan untang sangkaon ni ALA Boxing Gym superstar Rey 'Boom Boom' Bautista sa "Pinoy Pride 12: Bakbakan sa Bohol" didto sa Carlos P. Garcia Sports Complex.
Si Bautista makigsangka ni Genaro Garcia, apan nadiskobrihan sa mga Cebu boxing reporters ug ALA Promotions nga ang Genaro Garcia nga ania sa Bohol nga maoy makigsangka ni Bautista dili ang Garcia nga ilang gipangayo sa Mexico.
Giparang si Bautista ni Genaro 'Poblanito' Garcia, kinsa adunay rekord nga 38-8, 22KOs ug nakaaway na'g walo ka world champions, apan ang mitaak sa Bohol mao ang kapariha'g ngan nga si Genaro 'Panterita' Garcia nga adunay rekord nga 10 ka daog ug 11 ang pilde.
Gawas sa dakung kalainan sa pamayhon, mitabang usab pagsakop sa sayop ang beteranong referee nga si Bruce McTavish, kinsa maoy miila ni Garcia nga dili ang orihinal nga kontra unta ni Bautista.
Si McTavish nakaila sa tinuod nga Genaro 'Poblanito' Garcia tungod kay naka-officiate na siya sa sangka sa Mehikano batok ni Hozumi Hasegawa niadtong 2006.
"We want to give Bautista a quality fighter, but instead they send us the wrong one," matud pa ni ALA Promotions president Michael Aldeguer sa usa ka emergency meeting didto sa Mandarin Royal Restaurant.
"This is a lesson for us, we are all victims," dugang pa niya.
Gibasol ni Aldeguer ang Mehikanong matchmaker nga si Hugo Correa, kinsa iyang gikatahapan nga maoy nagbulabog sa pagpadala og dili maong boksidor.
Imbes papultahan, libre na sa tanan ang maong away aron dili kadudaha ang ALA Promotions nga nangilad sa boxing fans. (BANAT SPORTS)