MANILA, Philippines - Mas malaki ang magaganap na tagisan sa Private Schools Athletic Association (PRISAA) mula Abril 22 hanggang 28 sa Cebu City.
Ito ay dahil sa paglaki ng bilang ng sports na paglalabanan sa taong ito ay nasa 18 na kasama ang 11 individual sports.
Ang mga ito ay ang athletics, swimming, boxing, badminton, chess, karatedo, lawn tennis, taekwondo, judo, dance sports at table tennis. Ang team events ay sa larangan ng basketball, baseball, beach volley, volleyball, sepak takraw, softball at football.
Lahat ng 17 rehiyon sa bansa ay darating para makipagtagisan sa ibang delegasyon at inaasahang papalo sa 6,000 ang mga atleta, coaches at officials na bibisita sa Cebu.
Para matiyak na magiging maayos ang officiating ay magkakaroon muna ng training the trainors seminar bago gawin ang torneo.
Tulad ng Palarong Pambansa, layunin ng kompetisyong bukas para sa mga mag-aaral na nasa pribadong paaralan na bigyan sila ng pagkakataong maipakita ang angking galing sa larangan ng palakasan upang matukoy ang mga ito sa iba’t ibang pambansang koponan.
Ilan sa mga tiningala mula sa PRISAA ay sina Lydia de Vega, Mona Sulaiman, Andres Franco at Lolita Longrosa sa athletics, Susan Papa, Ral Rosario Pedro Cayco, Parsons Nabiula at Williams Wilson ng swimming.