MANILA, Philippines - Mga pangunahing atleta ng bansa ang magtatagisan nang lakas sa muling pagtatanghal ng Seasports Festival sa darating na Marso 24-25 sa likod ng Manila Ocean Park.
Isang proyekto ng Manila Broadcasting Company at Lungsod ng Maynila, sa pakikipagtulungan ng Philippine Coast Guard, ang Seasports Festival ay susukat nang galing at lakas sa pagsagwan ng mga dragon boat, gayundin sa pangangarera ng mga bangkang de-motor. Mahigit kalahating milyon ang nakalaang pa-premyo sa naturang mga karera, kung saan matutunghayan ng mga manonood ang kakaibang bilis at lakas ng mga atletang dagat mula sa ibat-ibang sulok ng kapuluan.
Ang Seasports Festival ay suportado rin ng Smart Communications, Caltex, Gold Eagle Beer, Cecon, M. Lhuillier, Briggs and Stratton, at Cord Marine Epoxy.
Ang mga bangkerong nais lumahok ay dapat magparehistro sa telepono bilang 8326175 simula ngayon.
Tig-32 kalahok lang ang tatanggapin sa stock at formula races, kaya first-come, first-served ang pagsali sa bancathon.