MANILA, Philippines - Lumaylay ang laro ng San Miguel Beermen sa endgame upang lasapin ang ikalawang kabiguan sa apat na laro sa Singapore Slingers, 71-63, sa idinaos na 3rd AirAsia ASEAN Basketball League (ABL) nitong Miyerkules sa Singapore Indoor Arena.
Si Filipino import Don Dulay ay mayroong 23 puntos habang solidong numero rin ang ibinigay ng mga imports na sina Louis Graham at Donald Little para maagaw ng Slingers ang liderato sa walong koponang liga sa 4-1 baraha.
May 19 puntos at 11 rebounds si Dalron Johnson para sa Beermen na nalaglag sa ikalimang puwesto kasalo ng Bangkok Cobras na pinatikim ng unang pagkatalo ang dating namamayagpag na Westports Malaysia Dragons, 73-70.
Kasalo ng Dragons sa ikalawang puwesto ang AirAsia Philippine Patriots na nangibabaw sa Saigon Heat, 76-62, nitong Miyerkules ng gabi sa Ynares Sports Arena sa Pasig City.