MANILA, Philippines - Kinailangan lamang ng NLEX Road Warriors ang unang 10 minuto sa tagisan nila ng Big Chill upang maiparamdam na sila ang nagdedepensang kampeon nang iuwi ng koponan ang 89-60 dominasyon sa PBA D-League Aspirants’ Cup do-or-die semifinals match kahapon sa Ynares Sports Arena sa Pasig City.
May tig-16 puntos sina RR Garcia at Calvin Abueva at nagsanib sa kabuuang 21 puntos sa first half upang ilayo sa halftime ang Road Warriors sa 25 puntos, 43-18.
May walong rebounds at 2 assists pa si Abueva upang maibangon ang sarili matapos mapatawan ng one-game suspension sa Game 2 dahil sa pananakit kay Jessie Collado.
Si Chris Ellis ay naghatid pa ng 12 puntos habang si Clifford Hodge ay may 11 rebounds para sa NLEX na haharapin ang napahingang Freego Jeans sa best-of-three finals na bubuksan sa Huwebes sa nasabi ring venue.