CEBU, Philippines - Naglantaw na sab ang Team Cebu City (TCC) nga moharos sa Private Schools Athletic Association (PRISAA) Regional Meet sama sa ilang gihimo sa miaging tuig.
Ang tinuig nga PRISAA gikatakda sa Pebrero 3-5 didto sa Tagbilaran City.
Ang multi-titled trackster nga si Lindley Fran Navaja sa University of Cebu (UC) maoy mangu sa TCC sa athletics uban nilang Dharl Pitogo, Ernesto Ybañez ug Irene Baluran, samtang ang swimmers sa University of San Carlos (USC) ug University of the Visayas (UC) maoy molangkob sa swimming team.
Sa lawn tennis, ang Niños magsalig sa abilidad sa managsuong Siso nga sila si Bernardine, Sallydine ug Sally Mae, samtang sila si Elonna Dane Tormis, Jennifer Jacalan ug Cindy Babalcon modepensa sa ilang korona sa women's table tennis.
Ang mga atleta gikan sa UC, UV, Southwestern University (SWU) ug University of San Jose-Recoletos (USJ-R) mopakita sa ilang katakus sa taekwondo ug karatedo, samtang ang USJ-R, UV ug USC maoy mangulo sa kampanya sa TCC sa badminton, sepak takraw ug football.
Sila si Edward Ybañez sa University of Southern Philippines Foundation (USPF), Mike Abria ug Eleazar Sagarino sa UV, Anna Bennova Sabanal ug Jera Mae Pacinio sa SWU ug Apple Eve Saraum sa USPF maoy pambato sa beach volley, samtang sila si Edward Pao, Brian Heruela, Mohammed Robinson, John Auditor ug John Aranas sa UC maoy komposisyon sa basketball team uban nilang Rene Pacquiao, Eleazar Armacin ug Bonifacio Guilena sa SWU ug sila si Sam Hermosa ug Cid Cortes sa USC.
Samtang ang CESAFI grandslam champion SWU Lady Cobras ug USC Spiking Warriors maoy ipaon alang sa volleyball event.
Ang top performers sa tulo ka adlaw nga kompetisyon maoy morepresentar sa Central Visayas alang sa 2012 National PRISAA Games nga gikatakda sa Abril 22-28 dinhi sa Cebu City. - (BANAT NEWS)