MANILA, Philippines - Naipasok ni Roider Cabrera ang isang tres sa pagtunog ng final buzzer para sa 57-56 paglusot ng Freego Jeans laban sa Cebuana Lhuillier sa semifinal round ng PBA D-League Aspirants’ Cup kahapon sa San Juan Arena.
Ang buslo ni Cabrera mula sa magandang pasa ni Lester Alvarez ay panukli sa passing error ni Kevin Alas sa huling play ng Gems para kunin ng Jeans Makers ang 1-0 kalamangan sa kanilang best-of-three semis series.
Naunang nagpakalayu-layo ng 16 puntos ang tropa ni coach Leo Austria, 29-13, pero bumangon ang Gems gamit ang kanilang husay sa pagbuslo sa tres.
Magkasunod na triples ni Terrence Romeo ang nagbigay ng 56-54 kalamangan sa tropa ni coach Luigi Trillo may 11.8 segundo sa laro.
Nasupalpal si Alvarez at ang bola ay lumabas pabor sa Gems may 6 segundo sa orasan ngunit ang kagalakan na naramdaman ng mga panatiko ng koponang pumangalawa sa NLEX sa Foundation Cup ay napalitan ng lungkot nang makakawala si Cabrera ng mahalagang tres.
“Ang maganda sa team ay naroroon na ang composure at confidence. Sana ay hindi magbago ang takbo sa next game,” wika ni Austria.
May 16 puntos at apat na steals si Alvarez, habang si Camson ay naghatid ng 11 puntos at 9 boards para sa Jeans Makers.
Si Vic Manuel ay gumawa naman ng 15 puntos, 13 rebounds at 2 blocks para sa Gems.
Muling magtutuos sa Huwebes ang dalawang koponan at ang isa pang panalo ng Freego Jeans ay magtutulak sa kanila sa kauna-unahang finals appearance.