CEBU, Philippines - Nakaamgo ang Green team sa ilang sakit nga kapildihan ug grabe kaayo ang gipahamtang nga bawos ngadto sa Pink team pinaagi sa paglubong, 90-73 sa Inter-color sa Phase 3 Camella Homes Sunday Club basketball tournament didto sa Villas Magallanes sa Lapu-Lapu City.
Upat ka players nga gipangulohan ni Allan Sepe ang mirehistro og double figures alang sa Green team nga nakabentaha og 10 puntos sa unang kuwarter, 27-17.
Hinuon, ang Pink sa giya ni team owner Rolly dela Pieza mipamabaw sa labaw ngadto na lang sa dos puntos, 65-57 paingon sa final period nga nakapagilok sa kaunoran. Apan ang makugihon nga Green alistong mihimo og kausaban sa katapusang kuwarter aron mainat og balik ang labaw ug sukad niadto wala na kini molingi pa hangtod nahurot ang oras sa duwa.
Si Sepe mikadlit og 19 puntos aron pangulohan ang Green team, gisundan ni Amay Palad sa iyang 17 puntos, Roilan Sumilang nga adunay 15 puntos ug Cortes nga mitikdol og 10 puntos.
Nangulo sa Pink team mao si Dela Pieza, kinsa mitiklo og 21 puntos, si Clied Malolot miambit og 18 puntos, Si Chucky Caro mitimbre og 11 puntos ug si Edwin Amistad mitimang og 10 puntos.
Sa laing aksiyon, ang Ryle Trucking midumbol sa Rollway Customs Brokerage, 82-80 sa Inter-company division. (BANAT SPORTS)