CEBU, Philippines - Wala hatagi'g gibug-aton ni reigning WBO Intercontinental flyweight Milan 'El Metodico' Melindo ang pagpanghudlat sa iyang kaatbang nga si former world title challenger Juan Esquer.
Sila si Melindo ug Esquer maoy magsangka sa main event sa "Pinoy Pride XI: Philippines vs. The World" karong Enero 28 didto sa Waterfront-Cebu City Hotel and Casino.
Atol sa iyang public workout sa miaging gabii didto sa Event Centre sa SM City-Cebu, si Melindo miingon nga wala siya mahadlok ni Esquer tungod kay bugtong anaa sa iyang huna-huna mao ang usa ka world title shot.
Ang Mehikanong si Esquer una nang namahayag nga iyang pahamtangan si Melindo sa labing unang pilde, apan wala matandog ang ALA fighter ug matud pa nga wala niya isipa ang langyaw'ng lisud nga kontra.
"Pang world champion ni ako gi-trainingan dili ni para iya," matud pa ni Melindo. "Dili siya magsige og estorya kay dili raba siya kaabot og five rounds nako."
Gawas sa pagdepensa sa iyang bakus, ang WBO No. 5 ug WBC No. 7, ihalad sab ni Melindo ang maong away ngadto sa iyang katagilungsod sa Cagayan de Oro City nga nabiktima sa bagyong "Sendong" sa miaging buwan. (BANAT SPORTS)