CEBU, Philippines - Walay kukaluoy nga gimasaker sa Wealth Bank ug Youth Club ang tagsa-tagsa nilang kaatbang sa nagpadayong Young Urban Community Basketball Association Organization (YUCBO) Sinulog Cup invitational basketball tournament niadtong Miyerkules sa gabii didto sa Benjamin Solon Memorial Gym sa Brgy. Cogon-Ramos, ning siyudad.
Unang miangkon og daog ang Wealth Bank human ilang gipilde ang Qualfone sa iskor nga 74-51.
Nag-wild og maayo si Daniel Razon aron mokadlit og 25 puntos ug ingon man pangulohan ang Wealth Bank. Sila Jonathan Bonjoc ug Joseph Bartolabac miugkat og 18 ug 10 puntos matag usa alang sa maong kadaugan.
Ang pilderong Qualfone gipangulohan sab ni Jared Positos, kinsa milansang og 17 puntos, gisundan ni Aylrhod nga adunay 13 puntos.
Sa pikas bahin, miangkon sab og daog ang Youth Club pinaagi sa paglubong sa Zapatera, 100-73.
Gipangulohan ni Marvin Cabrera ang kadaugan pinaagi sa iyang 21 puntos. Miabag sab si Rey Mario Edaño Jr., kinsa mitimbre og 20 puntos, sila si Mark Tecson, Vergel Fuentes ug Jacaban mirehistro sab og double figures alang sa Youth Club.
Mipabuhagay unta og 30 puntos si Piolo Adlawan, apan nakawang lang ang iyang paningkamot kay wala kini makapadaog sa Zapatera.
Si Jacob Cuyos mitikdol og 18 puntos ug si B. Sanchez mitimang og 10 puntos sa maong kapildihan.
Gipasiugdahan sa YUCBO ubos sa ilang founder/organizer ug kanhi Cogon-Ramos Brgy. Capt. Noel M. Godiz, ang torneyo gipaluyohan sab sa Cebu City government ubos sa liderato ni Mayor Michael Rama.
PUNTOS MATAG USA
Unang duwa:
WEALTH BANK (74) - Razon 25, Bonjoc 18, Bartolabac 10, Lugas 7, Opoc 4, Villiocin 2, Bonel 2, Suarez 2
QUALFONE (51) - Positos 17, Llacuña 13, Go 10, De Leon 10, Jumalon 4
Ikaduhang duwa:
YOUTH CLUB (100) - Cabrera 21, Edaño 20, Tecson 15, Fuentes 14, Jacaban 13, Magallon 5, Alfafara 5, Barrida 4, Ylaya 3
ZAPATERA (73) - Adlawan 30, Cuyos, 18, Sanchez 10, Dakay 5, Guisadio 4, Arnejo 3 (BANAT SPORTS)