MANILA, Philippines - Pangungunahan ni San Sebastian star Calvin Abueva ang listahan para sa Mythical Five sa pagdaraos ng UAAP-NCAA Press Corps at SMART ng taunang Collegiate Basketball Awards sa Enero 21 sa Gateway Suites sa Cubao, Quezon City.
Nasa grupo rin ang apat na varsity stars na miyembro ng Sinag Pilipinas na kumuha ng gintong medalya sa nakaraang 26th Southeast Asian Games sa Indonesia.
Makakasama ni Abueva, ang NCAA Most Valuable Player, sa Mythical Five sina Greg Slaughter at Kiefer Ravena ng Ateneo, Garvo Lanete ng San Beda at UAAP MVP Bobby Ray Parks, Jr. ng National University.
Ang 6-foot-4 na si Abueva ang gumiya sa Stags sa NCAA Finals sa ikatlong sunod na season.
Binanderahan rin ng pambato ng Pampanga ang San Sebastian sa makasaysayang paghahari sa 2011 Philippine Collegiate Champions League.
Ang Stags ang naging NCAA team na kumopo sa national crown.
Sina Slaughter at Ravena naman ang tumulong sa Blue Eagles sa pag-angkin sa kanilang pang apat na sunod na UAAP crown.
Si Garvo ang namuno sa pagsakmal ng SBC Red Lions sa record-tying 16th NCAA championship.