CEBU, Philippines - Pormal na nga buksan ang gikahinaman nga 2nd Cebu Basketball Association-M. Lhuillier Kwarta Padala Mayor's Cup karong hapon diha sa Cebu Coliseum.
Unom ka koponan ang magsangka alang sa P100,000 nga ganting salapi nga pangulohan sa defending champion Salazar Colleges of Science and Institute of Technology (SCSIT) Skyblazers, Rollway Customs Brokerage, Southwestern University (SWU) Cobras, Asian College of Technology (ACT) Cyber Knights, ThreeSixty Pharmacy ug ang Ave Maria Sanctuary Park.
Sa unang duwa sa alas-2 sa hapon, ang Skyblazers mosugod sa ilang kampanya pagdepensa sa ilang korona batok sa Rollway Customs Brokerage ni Rolly dela Pieza, samtang ang SWU Cobras makigsangka sa ACT Cyber Knights sa alas-4 sa hapon.
Sa katapusang duwa karong adlawa, ang ThreeSixty makigbatok sa Ave Maria sa alas-6 sa gabii.
Atngan karong adlawa mao ang ThreeSixty Pharmacy ni coach Mark Tallo tungod kay ang iyang anak nga si kanhi CESAFI Juniors MVP ug Talk ‘N Text Liga ng Bayan MVP Mark Jayven Tallo moduwa uban sa iyang mga teammate sa De La Salle Green Archers nga sila si Jarelan Tampus ug Mark Kong.
Mopalig-on usab sa ilang line-up ang presensiya ni ex-PBA big man Ken Bono ug Dino Daa.
Sa ilang bahin, ang Ave Maria andam mopakgang sa dautang laraw sa ThreeSixty diin ilang iparada ang mga beterano nila sama ni Jercules Tangkay, Danny Aying, Alex Cainglet ug Jerry Cavan.
Ang torneyo mosunod og single round robin format, diin ang top two teams makakuha og twice-to-beat advantage sa crossover semifinals. Ang modaog maoy moabante sa best-of-three finals series. (BANAT SPORTS)