CEBU, Philippines - Gidabodabohan sa Bureau of Internal Revenue (BIR)-Cebu ubos ni regional director Rodita B. Galanto ang USC-South Green, 94-71 alang sa ilang ikaduhang daog sa nagpadayong University of San Carlos BED South Campus-Parents, Teachers Community Association Inc. (USC BED SC-PTCA, Inc.) basketball tournament didto sa USC-South campus covered court.
Kanunay naglabaw ang BIR sulod sa unang-duha ka kuwarter ug miposte'g 13 puntos nga bentaha sa halftime sa iskor nga 43-30 sa pagtimon sa ilang skipper nga si Yoly Meso, kanhi UV Lancer center Jerson Espinosa ug Clint del Rosario.
Sa mga paningkamot nilang Allen Sorela ug del Rosario, ang BIR ni coach Norwin Honoridez milusad og 29-17 run aron inaton og maayo ang labaw ngadto na sa 25 puntos, 72-47 paingon sa fourth period ug wala na tugoti nila nga mosikit pa ang USC South-Green hangtod nga nahurot ang oras sa duwa.
Si Sorela miposa og 20 puntos aron pangulohan ang opensa sa BIR nga nagbitbit og 2-1 nga baraha. Si del Rosario miabuno og 15 puntos, samtang si Meso midugang og 14 puntos.
Sila si Espinosa ug Lito Ortiz miamot og 12 puntos matag usa alang sa kadaugan.
Ang USC South-Green gipangulohan sab ni Rodel Sartagoda, kinsa miburak og 20 puntos.Si Edwin Lazaga mitampo og 15 puntos alang sa USC South-Green nga wala pa gihapon makatilaw og daog sud sa tulo ka duwa.
PUNTOS MATAG USA
BIR (94) - Sorela 20, Del Rosario 15, Meso 14, Espinosa 12, Ortiz 12, Tocao 8, Valenzuela 7, Galvez 6
USC SOUTH-GREEN (71) - Sartagoda 20, Lazaga 15, Soco 10, Mendoza 10, Virtudazo 10, Adlawan 4, Daan 2 (BANAT SPORTS)