CEBU, Philippines - Gipakita sa Bureau of Internal Revenue (BIR) pinbusters aron mahimong team champion sa bowling event sa Association of Regional Executives in National Agencies (ARENA-7) didto sa Gaisano Bowlingplex sa Banilad, ning dakbayan.
Nasakmit sab sa BIR bowler ang Master category diin si Bel Suelto maoy nahimong kampiyon ug ang BIR sports coordinator nga si Emilio Tuvera maoy nakaangkon sa ikaduhang puwesto. Ang third placer mao si Yeno Kangleon sa Department of Public Works and Highways (DPWH).
Ang DPWH mao sab ang miangkon sa first runner-up sa team event ug second ang PhilHealth.
Ang Metropolitan Cebu Water District (MCWD) mihakot og 849 pinfalls aron maangkon ang highest team single, samtang sa individual event, si Warren Tecson sa PhilHealth maoy nakakuha sa highest men single sa iyang 235 pinfall. Ang pambato sa Department of Health nga si Gladdie Casas maoy nakaangkon sa highest women’s single sa iyang 209 pinfalls.
Sa laing bahin, si Celi Adolfo sa Department of Agrarian Reform (DAR) maoy kampiyon sa women's masters category. Sila si Casas sa DOH ug Jelyn Cadeliña sa MCWD maoy miangkon sa ikaduha ug ikatulo nga dapit. (BANAT SPORTS)