Nalipay ko bisan dili kaayo ko mahilig o makamao sa duwang football nga nakakita og kahayag ang mga atleta nato ug sa kabataang gustong mahimong susama nilang David Beckham ug ang sikat kaayong Brazilian nga si Cristiano Ronaldo sa Real Madrid team.
Kini tungod sa ipatumang ‘grassroot’ program sa Philippine Football Federation inabagan sa German coach Eckhard Krautzun nga gipadala dinhi sa Deutscher Olympischer Sportbund ug sa Deutscher Futball-Bund aron tabangan ang Philippine Football Federation sa pagpalambo sa duwa nga soccer dinhi.
Wala gyud masayop si Krautzun sa iyang pamahayag nga daghan ang interesadong kabataang Filipino nga makat-on og soccer, apan ang problema mao gyud ang kakulang sa mga pasilidad sama sa football fields sa nasud.
Bisan dinhi sa Sugbu, pipila lamang ka mga tunghaan ang adunay football fields ug kasagaran kanila mga pribadong tunghaan. Aduna may football fields sa ubang public schools apan wala say klaro ang ilang sports programs.
Ang football dili para sa mga dagku'g lawas tungod kay daghan man nga football teams ang igo-igo ra ang gidak-on sa ilang players. Sama sa Sri Lanka, maong dili gyud kabentahaan ang mga Pinoy.
Ang atua na lang gyud mao nga kinahanglang ma-improve ang quality sa atong dinuwaan. Gani sumala pa sa usa ka soccer addict kinahanglang bansayon ang passing ug menosan ang dribbling kun sa basketball pa.
Si Krautzun nakakita usab nga dili mosaler nato ang long kicks. Kinahanglan daw nga duwaon nato ang soccer basi sa atong size. Kini nagpasabot sa kaabtik sa mga Filipino ug kapaspas sa pagdagan.
Unta magbunga og maayo ang grassroot program sa PFF aron makapadala og maayong mga booters sa umaabot nga 2013 Southeast Asian Games. Kalimtan nalang nato ang pait natong kapildihan sa atong Under-23 Azkals sa nakalabay’ng SEA Games didto sa Indonesia sa miaging bulan.
Ato na lang pangandaman ang Under-23 sa 2013 pinaagi sa praktis, praktis, praktis! Ang nakanindot aning grassroot programs matud pang Krautzun diha ta makakuha og players alang sa FIFA Under-19 ug Under-17 teams nga diin usab mokuha og player alang sa national team nga Azkals.
Unta ang mga local government units mohatag sab og importansiya sa sports diha sa ilang mga lugar. Kanindot nalang baya nila tan-awon unya og tupad nila ang ilang homegrown athletes nga nagwarawara sa atong bandila ug tropeyo o medalyang bulawan!
* * *
Bisan pa man sa diriyot nga 'kapildihan' ni Manny Pacquiao kang Juan Manuel Marquez wala gihapon mawala ang kahinam sa mga boxing fans sa kalibotan nga abuton si Pacman ug si Floyd Mayweather Jr. alang sa usa ka megafight.
Sumala pa sa mga tabi-tabi sa internet, halinon gihapon kaayo ang Pacquiao-Mayweather fight tungod sa kauhaw sa mga fans sa resulta kun si kinsa gyud sa duha ang pound-for-pound king. Gawas pa niana daghan usab ang gustong makita si Pacquiao nga makabawi gikan sa kadudahang kadaugan niini batok kang Marquez.
May nanggawas na hinuon nga mga balita nga aduna nay negosasyon bahin niini ilabi na gikan sa kampo ni Pacquiao. Maayo unta og dili na mausab ang mga palpak nga negosasyon tungod sa isyu sa paagi sa drug testing nga gidemanda ni Mayweather.
Dugang pa niini ang isyu sa bahinay sa kitaon, ilabi na kay syurbol nga di gyud magpabentaha si Mayweather samtang si Pacquiao dili man siguro angayang maoy mopaubos isip 8-weight division champion. Laing isyu nga sulbarunon mao ang pagpunay og linabayay og makapainit nga komento sa duha ka kampo.
Matud pa sa report sa ABS-CBN website, basi sa ilang gihimong live text data visualization sa mga opinyon sa publiko pinaagi sa Twitter, Facebook, blogs, ug uban pang websites pulos nahisgutan ang Pacquiao-Mayweather fight. Kini giisip nga pagpakita sa kasamtangang mood sa publiko. Nga sa ato pa daghan gyud ang gusto.
* * *
PAGTULON-AN: Kinahanglan ang kaisog aron mobarog ug motingog; kaisog usab ang kinahanglan aron molingkod ug maminaw sa uban.
* * *
PAHINUMDOM: Alang sa SIOUX members sa Sugbu ug sa Central Visayas nga interesadong modonar og tsinelas alang sa atong Christmas project, palihug kontaka sa dili pa ang Disyembre 5 si Brod Intsik o ni bisan kinsang opisyales sa Grand SIOUX Alumni Council. Salamat.