MANILA, Philippines - Mula sa pagbibida nina PJ Simon at Kerby Raymundo sa final canto, kinuha ng Llamados ang kanilang ikalawang sunod na panalo.
Umiskor si James Yap ng 25 points kasunod ang 17 ni Simon at 15 ni Raymundo ng upang tulungan ang B-Meg sa 95-79 panalo sa Meralco sa elimination round ng 2011-2012 PBA Philippine Cup sa Cuneta Astrodome kahapon sa Pasay City.
“This is the time we have to make our surge, our move,” sabi ni coach Tim Cone sa Llamados, umiskor ng 76-65 panalo sa Shopinas.com Clickers noong Nobyembre 2. “We can’t lag too far back and expect to catch anybody.”
May 4-4 baraha ngayon ang B-Meg sa ilalim ng Rain or Shine (6-1), nagdedepensang Talk ‘N Text (6-1), Barako Bull (5-2), Petron Blaze (5-3) at Meralco (5-4) kasunod ang Barangay Ginebra (3-4), Powerade (3-5), Alaska (1-6) at Shopinas.com (0-8).
Kasalukuyan pang naglalaban ang Elasto Painters at ang Energy habang isinusulat ito.