CEBU, Philippines - Mikulit og 16 puntos si customs police Jingjing Rama aron pangulohan ang Bureau of Customs (BOC) sa ilang impresibong 67-54 nga kadaugan batok sa Department of Science and Technology (DOST) sa Group B division sa Association of Regional Executives in National Agencies (ARENA-7) basketball tournament niadtong Miyerkules didto sa Sacred Heart School gym sa Gen. Maxilom Ave., ning siyudad.
Laing customs police nga si Boodie Monteño miiskor og 14 puntos uban ang walo ka assists.
Ang BOC ubos ni Port of Cebu District Collector Atty. Ronnie Silvestre mao kanunay ang naglabaw bisan pa'g misikit ang DOST sa first period, 19-17. Ang BOC misugod og pauwan sa ilang mga puntos sa second quarter diin miposte kini sa ilang kinadak-ang labaw 20 puntos, 58-38 sa nahabiling 6:50 sa fourth period ug sukad niadto wala na makasikit pa ang DOST.
Ang DOST gipangulohan sa tandem nilang Renato Bas ug Anthony Dinglasa nga nagkumboya og 22 puntos.
Puntos Matag Usa
BOC (67) - Rama 16, Monteño 14, Matugas 8, Cañete 7, Mose 5, Quinio 4, Manahan 4, Dela Cruz 4, Laraga 3, Remonde 2
DOST (54) - Bas 12, Dinglasa 10, Raboya 8, Retazo 5, Cabellar 4, Bustillo 4, Camposo 4, Ybañez 3, Villahermosa 2, Dogante 2. - BANAT NEWS