CEBU, Philippines - Na-unhan sa defending champion University of Cebu (UC) Webmasters ubos sa ilang 6-9 nga higante nga si Junemar Fajardo kinsa mibahug og 26 puntos aron baswaton ang iyang team ngadto sa kulbahinam kaayong 87-84 kadaugan batok sa Southwestern University (SWU) Cobras atol sa Game 1 sa ilang best-of-five championship series sa Cebu Schools Athletic Foundation, Inc. (CESAFI) kaniadtong Sabado didto sa Cebu Coliseum.
Tataw man tuod nga si Fajardo lang kanunay maoy sandiganan sa opensa sa Webmasters kinsa mao sab ang leading scorer ug MVP sa lega, daghan ang nahimong bayani nga miamot sa maong kadaugan ug usa na kanila ang gamitoy nga defensive point guard nga si Francis Luigi Bercede kinsang three-pointer maoy miinat sa ilang labaw ngadto sa kuatro puntos, 84-80 human mosikit ang Cobras, 80-81 pinaagi sa duha ka free throws ni Rene Pacquiao eksaktong tres minutos ang nahibiling oras sa fourth period.
Gitiwasan pa gyud kini ni Edward Pao kinsa naka-igo ug laing three-pointer alang sa 87-82 nga abante may 1:50 ang nahibiling oras ug dayon, gipahugtan sa Webmasters ang ilang depensa aron maka-eskapo og tres puntos nga kadaugan.
Daw sa gibati og tumang pressure ang Cobras sa kataposang usa ka minuto tungod kay misipyat sa iyang three-pointer si Eleazar Armecin nga init unta kaayo sa sayong bahin sa duwa ug misipyat sab sa duol niyang tirada si Bonifacio Guillena kinsa daling mi-foul kang Quinton Brian Heruela sa Webmasters aron seguradong mabinlan sila’g diotay’ng oras.
Higayon unta sa Cobras nga makapugos og overtime apan misipyat gihapon si Armecin sa iyang desperate long distance shot atol sa paghuni sa buzzer.
Si Pao kinsa nakahimo’g limpyo nga tapal ngadto sa 6-6 nga sentro sa Cobras nga si Justin Aboude sa nahibiling pipila ka segundos, mihakot ug 18 puntos samtang sila si Bercede ug Robinson Mohammad midugang ug 14 ug 13 puntos, matag usa.
Si Guillena maoy nangu sa Cobras sa iyang 22 puntos samtang parehong miamot ug 17 puntos matag usa silang Armecin ug Pacquiao. Si Aboude miposa ug 15 puntos ug si Joseph Nalos mitikdol og 11 puntos.
Ang Webmasters kinsa nagpabuhagay ug 10-0 run sa uwahing bahin sa second period, milabaw ug siyete puntos sa halftime, 46-39 gikan sa three-pointer ni Pao.
Tinguha sa Webmasters nga mokulit ug 2-0 nga banate karong gabhiona aron makuha ang dakung bentaha ug makaginhawa’g luag-luag.
Sa ilang tulo ka higayon nga panagbagat karon nga season, nagtabla sa 1-1 ang Webmasters ug ang Cobras ug pulos wala maglagyo ang resulta sa duha ka duwa. Unang midaug ang UC, 76-72 niadtong Agosto 25 ug nakabawos ang Cobras sa sunod duwa, 71-68 niadot lang Oktubre 13 nga maoy adlwa’ng natawhan ni UC president Atty. Augusto W. Go.
Puntos matag usa:
UC (Srs.) 87— Fajardo 26, Pao 18, Bercede 14, Mohammad 13, Heruela 10, Caytuna 4, Auditor 4, Ampoon 0, Aranas 0, Batino 0
SWU (Srs.) 84— Guillena 22, Armecin 17, Pacquiao 17, Aboude 15, Nalos 11, Arong 2, Bregondo 0, Ortuyo 0. Halftime 46-39. - BANAT NEWS