CEBU, Philippines - Gipahimuslan sa third-seeded University of the Visayas (UV) Green Lancers ang ilang mas taas nga championship experience aron pagpukan sa second seed Southwestern University (SWU) Cobras, 73-67 niadtong Huwebes aron pagpugos og rubbermatch alang sa ikaduhang luna sa finals sa collegiate division sa 11th Cebu Schools Athletic Foundation, Inc. (CESAFI) basketball event didto sa Cebu Coliseum.
Usa ka 15-2 run ang gipabuhagay sa Lancers sa second period aron mapapas ang ilang 12 puntos nga biya, 21-33 ug nausab ang dagan sa duwa. Nailog nila ang momentum ug miposte'g otso puntos, 48-40 pinaagi sa three-point play ni Jerome Silva sa nahabiling dos minutos sa third period.
Mibawos ang Cobras pinaagi sa pito ka sunod-sunod nga puntos aron mosikit, 47-48 sa basket ni Bonifacio Guillena Jr. sa nahabiling 4:47 sa ikatulong kuwarter.
Ang Cobras sa pagpangulo ni Cameroonian Justin Aboude milusad og laing mainitong rally aron maangkon og balik ang labaw, 53-51 paghuman sa third period.
Sa final period gipakita sa Lancers ang ilang kabangis ug gipaila nila ang tinuoray nga karakter isip kampiyon diin mipabuhagay kini sa ilang opensa uban ang hugot nga depensa.
Si Michael Abad maoy nangu sa Lancers sa iyang 18 puntos, samtang si Silva miugkat og 14 puntos.
Nagsugod og kolapso ang Cobras dihang na-fouled out si Guillena sa tunga-tungang bahin sa fourth quarter ug nakabsan sila’g mga tirador ilabi na kay wala kaayo makahuygo si Eleazar Armecin kinsa igo lang mihimo’g nuybe puntos.
Ang Cobras, kinsa makigsangka pag-usab batok sa Lancers karong Martes alang sa katapusang luna sa finals, gipangulohan ni Aboude pinaagi sa iyang 17 puntos. Sila si Guillena ug Rene Pacquiao nagkumboya og 24 puntos.
Ang Cobras miharos sa Lancers sa duha ka duwa sa elimination. Una sa iskor nga 64-56 ug nasundan sa iskor nga 71-69. (BANAT SPORTS)