CEBU, Philippines - Kolor berde ang motabon sa pipila sa mga kadalanan dinhi sa siyudad sa Sugbu dihang maghugop ang dul-an sa 20,000 runners nga modagan sa Cebu leg sa 35th Milo Marathon ugma diha sa Cebu City Sports Center (CCSC).
Isip tipik sa labing dakung running event sa nasud, mga elite ug fun runners lakip na usab ang mga estudyante ang gipaabot nga mosalmot sa maong lumba.
Sama sa gihapon ang Cebu leg gibahin sa upat ka kategoriya -- 21K qualifying run, 10K, 5K ug 3K fun run.
Atol sa press conference kagahapon didto sa CCSC conference room, si Cebu leg organizer Ricky Ballesteros nagkanayon nga gawas sa ginukdanay, mas hugyaw ang lumba ning higayona tungod usab sa giandam nilang mga side events sama sa cheerdance ug fireworks display.
Ning tuiga, mas daghan ang nagparehistro sa 21K, nagpasabot nga mas daghang Sugbuanon ang gipaabot nga mosulod sa 42.195K National Finals sa Disyembre didto sa kaulohan.
"Tungod sa running boom dinhi sa Cebu, we expect nga daghan ang mo-stand out ug maka-qualify alang sa National Marathon," matud pa ni Ballesteros.
Usa ka oras ug 15 minutos maoy qualifying time alang sa men's, samtang usa ka oras ug 35 minutos alang sa women's division.
Gawas sa mananaog sa matag dibisyon, ang Nestle Phils. mohatag usab og pahalipay ngadto sa tunghaan nga adunay labing daghang runners.
Sa laing bahin, 500 ka mga tinun-an gikan sa lima ka pampublikong tunghaan dinhi sa siyudad sa Sugbu ang nakadawat og "advocacy shoes" gikan sa Milo.
Ang mga tunghaan naglakip ang Apas National High School, Barrio Luz National High School, Don Vicente Rama National High School, Inayawan Elementary School ug Abellana National School. (BANATSPORTS)