CEBU, Philippines - Sila si Bayani Alvarez sa ABS-CBN ug Llerin Andreana sa Sunstar maoy nangu sa mga mananaog sa 2011 Press Freedom Run kagahapon sa buntag didto sa Cebu Business Park.
Si Alvarez milabang sa finish line sa oras nga 20:15.99 aron sakmiton ang unang dapit sa 5K men’s run, samtang si Andreana mao sab ang nag-una sa women’s class human niya gitapos ang lumba sa oras nga 27:12.37.
Gisundan si Alvarez ni Jurlito Montecillo sa Sunstar (22:29.18) ug Dino Tantan sa The Freeman (24:04.72) nga mipahiluna sa ikaduha ug ikatulo nga dapit.
Ang second placer sa 5K women’s class mao si Shiela Garde sa Sunstar (30:56.90), gisundan ni Divine Ngujo sa The Freeman (31:27.46) nga miangkon sa ikatulo.
Giharos sa Cebu Daily News ang unang dapit sa 3K.
Si Gabby Lariosa, ang beteranong marathoner maoy naghari sa 3K men's sa oras nga 13:15.09, samtang si Corra Aliste mao sab ang gikoronahan isip hara sa 3K women's.
Giharos sab sa The Freeman ang mosunod nga duha ka dapit sa 3K men's category. Sila si Dennis Tantan (13:30.66) ug Julius Panerio (14:59.98) maoy mi-okupar sa ikaduha ug ikatulo nga dapit.
Mikompleto sa top three finishers sa 3K women’s division mao sila si Feliciana Prestillo sa The Freeman (22:24.32) ug Grace Morales (22:54.76) sa Sunstar.
Kapin sa 200 media practitioners gikan sa print, TV ug radio ang miapil sa lumba nga usa sa mga kalihukan sa katapusang adlaw sa 17th Cebu Press Freedom Week. (BANATSPORTS)