CEBU, Philippines - Maihap na lang ang adlaw sa giingon labing dakung boxing event nga mahitabo sa Pilipinas karong tuiga dihang ang ALA Promotion milusad og "countdown" alang sa gipaabot nga WBO flyweight title fight tali ni ALA ring star Donnie 'Ahas' Nietes ug defending Mexican champion Ramon 'Principe' Garcia Hirales alang sa "Pinoy Pride 9" karong Oktubre 8 didto sa University of St. La Salle Coliseum, sa Bacolod City.
Ang kanhi janitor ug karon kampiyon nga si Nietes, kinsa mibakante sa iyang WBO minimumweight title alang sa iyang damgo nga mahimong two-division world champion nagmaya usab sa kahigayonan nga makuha ang bakus didto mismo sa iyang yutang natawhan sa Bacolod.
"Sobra sa kalipay, natuman gyud akong pangandoy ug ako gyud nga buhaton ang tanan aron makuha ang laing world title,” matud pa ni Nietes.
Si Nietes uban ang iyang trainer nga si Edito Villamor ug stablemate nga si AJ 'Bazooka' Banal milarga kagahapon paingon sa Bacolod diin didto ipahigayon ang ilang training camp alang sa preparasyon sa umaabot nga away.
Si Banal may kahigayonan nga mopamatuod nga andam na siya sa giplanohang "rematch" batok ni Panamanian Rafael 'El Torito' Concepcion sa iyang pakigsangka ni undefeated Mexican Mario 'Maca' Briones.
Si Banal mosuway pag-iskor og impresibong daog batok ni Briones sa ilang WBO Asia Pacific bantamweight championship match.
"We felt he (Banal) had to go through this fight against a tough opponent. If he shows well then Concepcion will be next," matud pa ni ALA Promotions CEO Michael Aldeguer.
Moaway usab sa undercard ang duha ka Negrense nga sila si Arthur 'El Matador' Villanueva ug Merlito 'D’Tiger' Sabillo.
Ang 22-anyos nga si Villanueva makigharong sa wala pa hinganling Kenyan boxer, samtang si Sabillo mosuway pag-angkon sa Oriental Pacific Boxing Federation (OPBF) minimumweight belt batok ni Tejares Singwancha. (BANATSPORTS)