CEBU, Philippines - Gitapos sa KIA Motors/White Gold ang elimination round pinaagi forfeiture batok sa Dynacast sa Sacred Heart-Ateneo Alumni Basketball Athletic Association (SHAABAA) Cebu Landmasters Cup 2011 didto sa SHS-AdC sa barangay Canduman, Mandaue City.
Ang KIA Motors mitapos sa elimination bitbit ang 10-2 nga baraha uban sa Istorya.net. Apan ang KIA Motors maoy no. 1 qualifier human nila gipilde ang Istorya.net sa ilang head-to-head match-up.
Ang quarterfinals sugdan ugma sa alas-7 sa gabii diha sa SHS-AdC old campus sa General Maxilom Avenue, ning siyudad.
Bisan sa ilang forfeiture, na-angkon gihapon sa Dynamic Power/Dynacast ang ikatulong puwesto sa ilang 9-3 nga baraha ug ang RDAK Transport/Edcon kinsa napilde sa Dynacast, maoy no. 4 sa ila usab nga 9-3 win-loss record.
Sa laing bahin, gipahibalo sa SHAABAA organizers ubos sa ilang outgoing president Regan King sa RDAK Transport nga ang All-Star Game himuon karong Domingo sa ala-1 sa hapon didto sa SHS-AdC Canduman Campus. (BANAT NEWS)