CEBU, Philippines - Ang Kenyan nga si Abraham Missos ug beteranang si Christy Sevilleno-Tutor maoy nidominar sa tagsa-tagsa nila ka dibisyon sa ERUF 161 Run niadtong Domingo didto sa Parkmall ground sa Mandaue City.
Ang third placer sa Don Sergio Osmeña Run niadtong Biyernes nga si Missos (41:12.82) mipukan ni Jordan Bacong (42:48.72) aron langkaton ang men's 12K title. Ang reigning Milo regional champion nga si Adonis Singson (43:40.41) nalandig sa ikatulong dapit.
Sa pikas bahin, ang kanhi reyna sa Cebu marathon nga si Sevilleno-Tutor mao sab ang milangkat sa korona sa women's 12K category. Si Sevilleno-Tutor, kinsa mi-oras og 58:31.93 gisundan sa laing mga beterana nga sila si Madelyn Carter (58:23.34) ug Merlita Arias-Dunkin (1:06.08.00) alang sa ikaduha ug ikatulo nga dapit.
Mibalik na sab katulin si Joel Delposo dihang iyang gidominar ang men's 6K division. Iyang gitapos ang lumba sud lang sa 22 minutos ug 17 segundos. Sila si Jorry Ycong (23:15) ug Harold Estrado (23:28) maoy miangkon sa ikaduha ug ikatulo.
Mikompleto sa top three finishers sa women's 6K mao sila si Krisel Diongson (28:35.78), Allysa Lagahit (29:31.09) ug Cecilia Cabahug (34:03.51).
Sa 3K fun run, sila si Jan Cliff Debulosan ug Lynle Cardenas maoy midominar sa tagsa-tagsa nila ka kategoriya. (BANATSPORTS)