CEBU, Philippines - Tulo ka gatos ka mga masaarong chess players sa Kabisay-an ang misalmot sa Visayas leg sa 19th Shell National Youth Active Chess Championship nga gibuksan kagahapon didto sa SM City-Cebu Activity Center.
Sukwahi sa miaging mga katuigan diin kapin sa 500 ang mga partisipante, ang organizers sa labing karaan ug dakung chess grassroots tournament mi-limit lang sa mga partisipante ngadto sa 300 aron dali silang makakita og mga batan-on nga adunay potensiyal sa duwang ahedres.
"We want to choose players with experience already, so in this manner, this time a high-caliber competition will surely be seen in the nationals," matud pa ni Shell sustainable development manager Suiee Suarez atol sa press conference kagahapon didto sa Krua Thai sa SM City- Cebu.
Sa labing unang higayon, ang girls division giapil sa Visayas leg ning tuiga.
Ang top placers sa boys and girls category mao ang morepresentar sa Visayas alang sa Grand Finals nga gitakda sa Oktubre 8 didto sa SM Megamall sa Manila.
Ilang sangkaon ang mga leg champions sa National Capital Region (NCR), Tuguegarao, Batangas ug Davao.
Mokabat ngadto sa P40,000 nga ganting salapi ang gigahin nga premyo alang sa mga mananaog ning duha ka adlaw nga chess tournament nga tapuson karong alas-5 sa hapon. (BANAT NEWS)