MANILA, Philippines - Gumana uli ang opensa ng UST sa tamang panahon upang makumpleto ang 77-73 panalo laban sa FEU dahilan upang magkasalo na ang dalawang koponan sa standings sa 74th UAAP men’s basketball kahapon sa Araneta Coliseum.
Pumukol ng di-inaasahang tres si Chris Camus na nasundan ng pangpalamang na triple ni rookie Kevin Ferrer para mapawi ng Tigers ang pagkawala ng 35-17 kalamangan sa second period upang magtabla ang dalawa sa ikatlo at ikaapat na puwesto sa 8-5 baraha.
Si Kevin Abdul ang bumandera sa Tigers sa kanyang 20 puntos, 13 rebounds at tig-dalawang steals at blocks at naghatid siya ng tatlong free throws sa endgame upang tuluyang ibaon ang Tamaraws sa labanan.
“Dahil sa mga players kaya kami nanalo. Andoon ang agressiveness, desire at focus na manalo kaya kahit nawala ang 18-point lead namin ay hindi sila bumigay,” wika ni Tigers coach Alfredo Jarencio.
May 17 puntos, 10 rebounds at 4 assists naman si Ryan Garcia at ang kanyang ikatlong tres ang nagpatikim ng 67-64 kalamangan sa FEU.
Ngunit apat na puntos na lamang ang kanilang naiskor laban sa 13 ng kalaban para matalo sa sagupaan.
Bago ito ay humirit naman ng 56-40 panalo ang National University sa La Salle para manatiling nakatuon sa hangarin na magkaroon ng winning momentum bago lisanin ang liga.
Si Bobby Ray Parks Jr. ay mayroong 25 puntos at 12 rito ay ginawa sa huling yugto para tuluyang maiwanan ang Archers at magkasalo ang dalawa sa 5-8 baraha.
UST 77 - Abdul 20, Ferrer 19, Fortuna 14, Teng 11, Camus 9, Vigil 2, Lo 2, Tan 0, Sheriff 0, Lao 0, Pe 0.
FEU 73 - Garcia 17, Pogoy 14, Romeo 12, Exciminiano 10, Ramos 8, Tolomia 6, Escoto 3, Foronda 3, Cruz 0.
Quarterscores: 23-11, 45-32, 55-53, 77-73.