Mao pa gani nila pagduwa, ang Sacred Heart School-Ateneo de Cebu (SHS-AdC) Magis Eagles yano kaayo nga milubong sa University of San Carlos (USC) Baby Warriors, 90-56 sa secondary division sa 11th Cebu Schools Athletic Foundation Inc. (CESAFI) basketball event kagahapon diha sa Cebu Coliseum.
Ning pagsuwat, ang University of the Visayas (UV) Green Lancers sa ubos sa ilang bag-ong coach ex-pro Felix Belano, padayon pang nakigbugno batok sa University of San Jose-Recoletos (USJ-R) Jaguars.
Si Belano maoy mihulip sa gibiyaang posisyon ni kanhi coach Elmer 'Boy' Cabahug.
Ang Magis Eagles, kinsa maoy nikontrolar sa tibuok duwa, walay hunong nga mipatuasik og mga puntos bisan asa nga anggulo. Nagpasabot kini nga andam na sila nga mosud pag-usab sa finals.
Ang Magis Eagles gipangulohan ni Jorine Cercado, kinsa mipupo og 14 puntos, samtang ang higante nga si Julius Cadavis ug Dawn Ochea miani og 12 puntos matag usa.
Si Ian Ortega, anak ni kanhi SWU Cobras Cesar Ortega maoy topscorer sa gipanitan nga Baby Warriors sa iyang 15 puntos, gisundan ni Mark Anderson nga miabuno og 10 puntos. (BANATSPORTS)