MANILA, Philippines - Sisikapin ng host University of Perpetual Help System Dalta na bigyan ng ningning ang hosting sa 87th NCAA sa pagpuntirya ng ikatlong sunod na titulo sa beach volleyball.
Magbubukas ang nasabing torneo sa Sabado sa La Salle Greenhills at ipaparada ng Lady Altas sina April Ann Sartin at Norie Diaz para sa hangaring madugtungan ang tagumpay na naiposte ng koponan sa huling dalawang edisyon.
Si Keshia de Luna ang dating kapareha ni Sartin pero ang two-time MVP ay hindi na masisilayan dahil tapos na ang kanyang playing years sa NCAA.
“Laban pa rin kami at talagang nag-eensayo kami nang husto para patuloy na bigyan ng karangalan ang aming paaralan at hindi masayang ang suporta sa amin ni Dr. Anthony Tamayo,” wika ni coach Mike Rafael.