CEBU, Philippines - Mabanhaw na usab ang panagribal sa Philippines ug Mexico sa kalibotan sa boksing dihang tulo ka ALA fighters ang moaway batok sa tagsa-tagsa ka Mehikanong kaatbang sa "Pinoy Pride 8: Philippines vs. Mexico" karong Septiyembre 10 diha sa Waterfront Cebu City Hotel and Casino.
Pangulohan ni Milan 'El Metodico' Melindo, uban nilang Jason Pagara ug bag-ong kaplag Genesis Servania, suwayan sa ALA fighters nga mosunod sa lakang nilang Manny Pacquiao ug Nonito Donaire Jr. nga pulos gikalisangan sa mga Mexican boxers.
"This is the first time in Philippine boxing history that we will have three Mexican’s coming here to fight," matud pa ni ALA Promotions president Michael Aldeguer atol sa news conference kagahapon didto sa Cebu Grand Hotel.
Ang undefeated world title contender nga si Melindo (24-0, 8KOs) makigsangka ni three-time challenger Francisco 'Chiquita' Rosas (27-8, 13KOs) alang sa bakanteng WBO Intercontinental flyweight title.
Lab-as pa gikan sa iyang impresibong first round knockout batok ni Mexican Rosendo Vega niadtong Pebrero, si Melindo mosuway na usab pagkulit og laing kombinsidong daog aron mohayag pa ang iyang paglaum alang sa usa ka world title fight.
"We can see he is ready (Melindo) for a world title and for now we are looking at that to happen and like what we did to Donnie (Nietes), we will do our best to bring a world title fight here for Milan," matud ni Aldeguer.
Sa iyang bahin, ang 19-anyos nga si Pagara (27-1, 16KOs) nga mailhan na sa iyang bag-ong bansagon nga 'El Niño' makigsinukliay sab og kumo batok ni knockout artist Rosbel ' Lobito' Montoya (12-2, 11KOs).
Si Montoya mao ang ikaduhang Mehikanong ikasangka ni Pagara sunod ni Juan Carlos Gallegos, kinsa mitikangkang sa fourth round sa ilang sangka niadtong Hunyo 11 diha gihapon sa Waterfront.
Ipakita usab ni Servania (14-0, 5KOs) nga angayan siya sa dakung oportunidad nga gihatag kaniya sa ALA Promotions dihang iyang sangkaon si Gerson 'El Nene' Guerrero (34-8, 26KOs). (BANAT)