CEBU, Philippines - Nasakmit sa team Alcords ni playing coach Ric Abatayo ang solong liderato human sa ilang kadaugan batok sa California ni Talisay City councilor Rodi Cabigas, 77-71 niadtong Martes sa elimination round sa Vintage Ball Club (VBC) 2011 basketball tournament didto to Pooc Sports Complex sa Talisay City.
Sa pagka karon, ang Alcords naghupot og 4-1 nga baraha.
Si Allan Cabrera maoy nangu sa Alcords sa iyang game-high 30 puntos, giabagan sab siya ni Marlon 'El Presidente' Reyes, kinsa miposa og 19 puntos lakip niini ang upat ka triples.
Samtang sila si Jun Guba ug Ray Alvarado maoy nangu sa California nga parehong mibugha'g 19 puntos, sila si Roy Jumag ug Mar Torres nagkumboya og 25 puntos.
Sa main game, ang Beer Gins ni Flor Yosores mikulit sab og daog batok sa Vintage, 76-67 alang sa ilang 2-3 nga baraha.
Mibahog og 24 puntos si Leo Gerasmio aron pangulohan ang Beer Gins, gisundan ni Jonas Lastimosa nga miabuno og 17 puntos ug Jonathan Ochea nga adunay 11 puntos.
Ang Vintage gipangulohan ni Julius Guba pinaagi sa iyang 16 puntos, samtang sila si Odie Dela Calzada ug Bily Cañedo mitampo og 14 puntos matag usa. (BANATSPORTS)