CEBU, Philippines - Bisa'g si Kent Ong lang ang bugtong player nga nakahimo'g double figures, ang Dynamic Power/Dynacast nakahimo gihapon sa pagdaog human nila hitapsingi ang Jollitraders, 52-51 sa Sacred Heart-Ateneo Alumni Basketball Athletic Association (SHAABAA) Cebu Landmasters Cup didto sa Sacred Heart-Ateneo gym sa Canduman, Mandaue City.
Nabiyaan ang Dynacast sa sayong bahin sa first period, 13-17 ug dihang ila nasakmit ang labaw, sila na maoy nagkontrolar sa duwa.
Ang Jollitraders nga gilangkuban sa faculty members ug staff sa Sacred Heart gipangulohan nilang Jaysar Esperat ug Sai Bacalso nga nagkumboya og 33 puntos.
Sa pasiunang duwa, ang RDAK Transport/Edcon ni SHAABAA president Regan King midaog batok sa Mackent sa iskor nga 67-59, midaog sab ang Kunstof batok sa A+Stuttures sa iskor nga 63-60. Ang Kiki’s Catering/JAPFA milubong sa Fiesta Cebuana, 54-41, ang Gaisano Capital mibuntog sa Filmon Hardware, 60-55 ug gilumsan sa Istorya.net ang San Remigio Beach Club sa iskor nga 70-48. (BANATSPORTS)