CEBU, Philippines - Gipakita sa US-based Mandaue fighter nga si Mercito “No Mercy” Gesta nga angayan siya sa kontrata nga gihatag kaniya sa Top Rank Inc. dihang sayun ra niyang gi-TKO sa round 3 ang beteranong Mehikano nga si Jorge “El Tigre” Pimentel kagahapon didto sa Home Depot Center sa Carson , California.
Ang undefeated lightweight nga si Gesta mipauwan og mga brutal nga kombinasyon aron patumbahon si Pimentel sa makatulo ka higayun sulod sa tulo ka round.
Sa third round, usa ka nagpungasi nga right uppercut ang gipatugpa ni Pimentel ngadto sa apapangig ni Pimentel kinsa naglisud na pagrekober rasun nga giundang ni referee Raul Caiz Jr. ang away sa oras nga 2:23.
Si Gesta kinsa padayun nga mo-train sa Wild Card Gym pabiling walay pilde sa 22 niya ka away, 11 ka daog niini gikan sa knockout, samtang si Pimentel nakahiagum sa iyang ika-12 nga pilde sa 34 niini ka away.
“After this great win, we will look into a possible big fight for Gesta maybe against IBF lightweight titlist Miguel Vasquez or WBA champion Brandom Rios,” matud pa ni Top Rank bigboss Bob Arum.
Ang Mexican-American nga si Rios mao ang miaway sa main event, diin gipahunong niini sa round 3 ang challenger nga si Urbano Antillon. - BANAT NEWS