CEBU, Philippines - Duwang baseball dinhi sa Sugbu gipaabot nga mouswag pa kay ang mga magtutudlo sa pampublikong eskuwelahan nipakita og interes sa coaching student-athletes pinaagi sa pagtambong sa coaching and officiating seminar nga gipasiugdahan sa Cebu City Sports Commission (CCSC) dili pa dugay diha sa Cebu City Sports Center.
Kap-atan (40) ka mga magtutudlo nisalmot sa Major League Baseball (MLB) seminar nga gipahigayon uban sa pakig-alayon sa Department of Education, Philippine Amateur Baseball Association ug sa Cebu City Government, sumala pa ni event facilitator ug Fastball Sports Venture general manager Jesse Bernad.
Ang RP coaches nga sila si Wilfredo Hidalgo Jr. ug Catalino Leron ug Dave Panese sa MLB maoy nihimo sa duha ka adlaw nga seminar nga gipahaom sa pilosopiya sa baseball ug ingon man ang fundamentals sa throwing, pitching, catching ug hitting.
Naghimo sab og aktuwal nga drills aron masabtan og maayo sa mga partisipante ang mga teroriya nga gipaambit ngadto kanila. (BANATSPORTS)