CEBU, Philippines - Ang Yaw-Yan ArDigma Martial Arts Federation Inc. mopahigayon og qualifying tournament alang sa ilang Yaw-Yan Fighting Challenge V nga uloha'g "Recompense" karong Agosto 8 sa alas-8 sa gabii diha sa Cebu Coliseum.
Gawas nga kini ang ikalimang edisyon sa tinuig nga kickboxing ug mixed martial arts tournament nga gipasiugdahan ni Yaw-Yan ArDigma-Cebu founder Benigno 'Ekin' Caniga Jr., magsilbe usab nga qualifying event alang sa Ground and Pound VI series nga pagasalmotan sa mga elite fighters gikan sa Luzon, Visayas ug Malaysia.
Gawas sa Yaw-Yan ArDigma, ang fight clubs nga moapil naglakip sa Projectile Fit, Calma Stable, Rednios Gladiator MMA sa Talisay, Soma Kickboxing , Arcom Jukai KBC , JR Grand MMA ug Unified MMA sa Mandaue, Yaw-Yan Musang, Durex KBC sa Lapu-Lapu.
Anaa usab ang Muay Thai Association of the Philippines sa Dumaguete, Red Dragon MMA sa Tagbilaran ug Mindanao Unified Martial Arts sa Cagayan de Oro City.
Moaway sa main event mao ang garbo sa Yaw-Yan ArDigma nga si Kyle 'Hurricane' Co batok ni Mark 'Terminator' Araneta sa Team Unified MMA.
Mopakita og aksiyon sa supporting bout mao sila si Renan 'Limbas' Noblefranca ug Danilo 'Alasan' Tudtud sa Yaw-Yan ArDigma batok nila ni Steve 'D Lightning' Sevilleno sa Cagayan de Oro ug Jijito 'Excalibur' Imbo sa Team Durex KBC. (BANAT SPORTS)