CEBU, Philippines - Nabatasan na nila running partner John Philip Duenas ug Mary Joy Tabal ang pagpangharus sa lumba, labing uwahi sa 11th Kapamilya Run kagahapon didto sa Asiatown I.T Park .
Sila si Duenas ug Tabal maoy mikampiyon sa tagsa-tagsa ka dibisyon sa lumba nga gipasiugdahan sa DYAB 1512 ug ABS-CBN Cebu.
Si Duenas naghari sa 16k men’s dibisyon sa oras nga 56:53.036, gisundan ni Adonis Singson sa ikaduhang dapit sa oras nga 56:58.282, samtang si Jobert Carolino maoy third placer sa oras nga 58:07.551.
Sa pikas bahin, si Tabal nag-una sa women’s class human siya milabang sa finish line sud sa usa ka oras, sayes minutos ug 03.789 segundos.
Gipukan ni Tabal ang beterana nga si Christy Sevilleno-Tutor kinsa maoy second placer sa oras nga 1:14.07 ug si Marichu Luterte sa ikatulo sa oras nga 1:19.59.
Ang 10k division gidominaran ni Jordan Bacong sa oras nga 35:12.450 uban sa mga runner-ups nga sila si Reprinel Banzon (35:32.420) ug Riez Enriquez (35:42.710).
Samtang ang top three finishers sa 10 women’s class mao ang managsuong Jhean (46:47.910) ug Lovely Andrin (46:48.870) uban si Camilia Luterte (52:47.380).
Midaog usab sa tagsa-tagsa nila ka kategoriya sa 5k category sila si Jorry Ycong (17:26.880) ug Jojielyn Mae Pepito (20:54.110). (BANAT NEWS)