CEBU, Philippines - Milampos ang topseeds Green ug Red teams sa pagpukan sa ilang managlahing kaatbang aron mo-abante sa finals sa 1st Major Alfonso C. Abbariao Memorial Cup basketball tournament kaniadtong Miyerkules sa gabii didto sa Benedicto College gym sa dalan A.S. Fortuna, Banilad, Mandaue City.
Ang Green kinsa mitapos sa elimination isip no. 1 seed sa ilang 8-2 nga baraha, midaog batok sa fourth-seed Yellow team sa usa ka low-scoring ballgame, 57-50 samtang ang Red team kinsa maoy no.2 seed sa ilang 7-3 nga baraha, midaog batok sa Blue team nga gipangulohan ni District Collector Ronnie Silvestre sa laing low-scoring ballgame, 47-33.
May purohan untang modaog ang Yellow kinsa mihakot og upat ka sagunson nga daog sa second round apan wala makaduwa si Mactan Collector Bingo Matugas tungod sa ka-apeke sa iyang schedule.
Matod pa ni Collector Silveste nga nakahuna-huna siya sa pagpasiugda sa Abbariao Cup aron pagkumbensi sa mga rank-and-file employees sa Bureau of Customs (BOC) sa pagpahigayon og compulsory nga physical fitness ug usa na niini ang pagduwa og basketball human mamatay si Maj. Abbariao ang Visayas Head of the Custom police tungod sa atake sa kasingkasing.
Tungod kay nakita sab ni Collector Silvestre nga daghan na’g dagko’g tiyan nga empleyado, iyang gi-agni ang taga Customs sa pagsalmot sa maong torneyo nga iya sab gipasikad sa TV reality show nga The Biggest Loser Asia ug maoy primerong tumong niini ang pagpa-menos og timbang inay sa pagdaog sa korona.
Ang iyang gibarugan nga motto o panultihon mao ang “Play to lose... lose weight.”
Ang Customs Police nga si Jingjing Rama misalida og maayo ug gawas sa pagsige og pamuntos, iya sab gipakita ang iyang abilidad sa dribbling ug passing.
Si Rama maoy nangu sa Green sa iyang 23 puntos.
Sa habig sa Yellow, ang shooting guard nga si Jojo Quinio maoy nangu sa iyang 12 puntos samtang sila si Ferdie Laraga ug Edwin Lopez midugang og 10 ug otso puntos, matag usa.
Si Quinio kanhi sakop sa Customs champion team sa CEPBA Invitational Cup diha sa USC gym pipila na ka tuig ang milabay ug nabalikan siya sa iyang duwa samtang mihulip sa pwesto ni Matugas isip shooter ug ball carrier.
Human lang makatabla ang Yellow sa 37-all pinaagi sa basket ni Lopez didto sa second half, si Rama dayon maoy nangunay sa opensa sa Green ug wala na nila hatagi’g higayon nga mosikit pag-ayo ang ilang kaatbang.
Sa laing bahin, ang batan-ong point guard nga si Boodie Monteño kinsa usa sab ka Customs police, maoy nangu sa Red sa iyang 12 puntos samtang sa habig sa Collector Silvestre-led Blue team, mihakot og 13 puntos si Rizzan Herbito samtang midugang og kuatro puntos si Collector Silvestre.
Puntos matag usa:
First Game:
Green (57)— Rama 23, Apuya 12, Dejarasco 7, Javellana 5, Parayno 4, Dalucapas 2, Bailio 2, Dela Cruz 2
Yellow (50)— Quinio 12, Laraga 10, Lopez 8, Datu 8, Baltazar 8, Remonde 4
Second Game:
Red (47)— Monteño 12, Cañete 11, Rabago 5, Nadal 4, Mose 4, Velez 4, Cabahug 3
Blue (33)— Herbito 13, Manahan 10, Mabalo 5, Silvestre 4, Canonayon 1 (GGM)(BANAT NEWS)