CEBU, Philippines - Maoy mag-abot sa winnner-takes-all finals ang mga players sa lungsod sa Liloan batok sa lungsod sa Sogod alang sa 5th Congressman Red Durano Cup basketball tournament karong Sabado, Hunyo 4 didto sa Danao City Civic Center.
Mibalik ang defending champion Sogod sa finals human ilang girapido ang host Danao City sa iskor, 87– 68 atol sa ilang knock-out game sa semifinals samtang sa laing duwa, gilampaso sa Lilaon ang Carmen sa iskor, 73-46.
Walay nahimo ang Danao sa pag-atake sa Sogod tungod kay bisan og dul-on nilang tirada dili man mosulod.
Bisan og wala nay bearing ang ilang duwa batok sa Carmen, ang Liloan team ni coach Teroy Albarillo mipakita sa ilang ka-andam paglangkat sa korona ug atol sa maong duwa, nangita sila’g labing epektibong kumbinasyon aron mulampos pagdaog sa korona.
Ang Liloan mihimo’g tournament record nga 13-0 winning streak ug nangita sa laing kadaugan aron masumpo nila ang Sogod kinsa nagtinguha og grandslam. (BANAT NEWS)